НАША КНИГА
Балсамара
1990
СИПАНИЧЕН ИНСЕКТАРИУМ
СИПАНИЧЕН ИНСЕКТАРИУМ
Ситнеж зајадлив вриеж беден
Потсмешливо сипаничен подбоцнувач
Во ноздрви влегува се кикоти низ прсти
Ce вовлекува создава активно твори
Мозолчиња од пот и нервоза катаден
Насекаде се шири бескрајно кривале
Шарена линија од комарци и муви
Безгазни крлежи и опнокрилни бубачки
Се стеснува кругот од приказни нови
Нови случки и оригинални согледувања
Се лепат на кожата печејќи
Разните температурни разлики
Клокотка водата прснуваат меурите
Од сончаница и пак наново
Сè така секојдневно со години
Се развива сипаничниот инсектариум
Се гради привидниот мир цутат војните
Во слатката монотонија во одот
По истите патишта околу нас
Се дебели напластува ново сало
Силното мото на провинцијата
Околу нас во оваа смисла
Така замислено од прапочетокот
Пред првиот потоп Ништо не може
Да се промени од корен